سر تر پايه په دنيا كښې

كه پيريان كه انسانان دي

څلور بول او كه مرغان دي

كه داغرونه

دريابونه

كه دالمر او كه سپوږمۍ ده

يا دهسك پر مخ بيشميره

چي ځليږي دا سپين ستوري

كه دا هرڅه په دنياكښې

دومره نور شي او بيا نورشي

او بيا ټول ما ته دعا كړي

ضرورت مي ورته نشته

چي ترې غواړمه دعاوي

زما بس يوه دعا ده

راسره پر دې دنيا ده

تر لمر زيا ته يې رڼا ده

مينه مينه اوښكلا ده

رانژدې تر خپله سا ده

دا زما دمور دعا ده

دلوي استاد ارواښاد ګل پا چا الفت ليكنه

رشوت څنګه وركيږي؟

وركول د ؛ نابود ساختن ؛ او ؛ ګم كردن ؛ په معني او ؛ وركول؛ دوركړې او عطاء

په معني خطي تجنيس لري يعني دواړه مصدره يو شان ليكل كيږي

مګر په تلفط كي يو راز نه دي هغه چي رشوت وركوي او هغه چي چا ته رشوت وركوي ډير فرق لري وركول دلومړي حرف په سكون دوه معني لري يو محوه كول او له مينځه وړل بل دمفقودئ په وجه يو شئ له لاسه وركول

كه يو ووايي زما دسترګو ديد ورك شو او بل ووايي زما دسترګو عينكي وركي شوې دا وركيدل يوه معني لري او هغه وركيدل بله معني لرييوه شي ته بل رنګ وركول او يو ښئ چا ته په نورو شيانو كښې پټول هم وركول ګڼلئ شو لكه پل وركول رشوت وركول يا قاچاق وركول چي هر حكومت يې په خپله خط مشي كښې خلګو ته وعده وركوي ډير اقسام لري چي ځيني يې دادي

كه يو تاجريو مقتدر شخص ته ډير زيات مال په ډيرو پيسو راوړي يا تاجران په تجارتي معاملو كښې حاكمه طبعه له ځان سره شريكه كړي او رشوت ته دتجارت رنګ وركړي دا هم رشوت وركول او رشوت وركول دي يعني دلته دواړ مصدرونه يو كيږي او يوه معني پيدا كوي ځكه چي هم رشوت په تجارت كي ورك شو او هم دتجارت په نامه وركړ شو وايي چي يوه لوي سړي له خپلې عملي او فعلي سره په يوه هوټل كښې ډير څه وخواړه چي حساب يې خداي ته معلوم دئ مګر په بل كي ډير لږ څه ليكلي وو چي دغه راز ارزاني چا په خوب كښې هم نه وه ليدلې وګورئ

دلته رشوت په ارزان فروشئ كښې ورك شو او هيچا رشوت ونه ګاڼه كه څوك په يوه شپه له انه پورته سړي ته لس لكه افغانۍ په قمار كښې قصدا بايلي دا هم رشوت وركول دي ځكه چي رشوت په قمار كښې ورك شو

هغه څوك چي دقاچاقي لاجوردو صندوقونه ونيسي او سبا ته پكښې دلاجوردو په ځاي دبيابان عادي تيږي پرتي وي دا هم قاچاق وركول يا وركيدل ګڼلئ شوو

كه چيري دډيرو خاينانو دوسيې له دفتر او ديوان څخه وركي شي يايې په دارلامان كښې په اور وسيزي دلته هم خيانت وركيږي او هم خاين اوس نو تاسې انصافا وواياست چي پدې هيواد كښې رشوت قاچاق او خيانت څومره ورك شوئ دئ

او حكومتونه پدې باب څومره موفق دي

---------------------------------------------------

داستاد پسرلي بابا ښكلئ شعر

سپوږمۍ ته

سپوږمۍ دنور بنګړي لږ وشرنګوه
چي څه راپورته كړي وليدلي زړونه
غواړي دچټو دګودر سندري
په پرديسۍ  كي سوليدلي   زړونه

سپوږمۍ له وريځو سره لوبې مكړه
وريځي دناز په غوښتو څه پوهيږي
دشپوپه زړه  كې دبڼو  په ژبه
په نغښتي راز و نياز نه پوهيږي

سپوږميه كړنګ ووهه كړنګ ووهه
درڼا كور ته خو لږ زنګ ووهه
له دنګو غرونو دې راپو رته كړه سر
له لوړو څوكو سره څنګ ووهه

سپوږمۍ د ورو په پلو مه نغاړه مخ
دزړه په سترګو تياره مه خوروه
لږ څه روڼې كړه دلار وركو لارې
وخت ځورولي نورهم مه ځوروه

سپوږمۍ تيارو مي لاس پر سر ونيو
دنړۍ حسن پټوي   را  ځخه
كركې مي ځاي نيسي ورو  ورو په زړه كې
معصومي هيلي لټوي راځخه

جهان په دوو سترګو پټيږي وايي
ماته دا دوه سترګي بينا راپريږده
نور نعمتونه لوروه پر نورو
قسمته ماته لږ رڼا را پريږده

خير؛ كه زړښت راځخه هيلي لوټي
خير؛ كه مي تش وي له سر وره ژوندون
دزړه پر كور مي تياره مه راوله
تر مرګه نه غواړم بې نوره ژوندون

ليږونكئ
محمدعلي عمري
سهيلي پښتونخوا مسلم باغ

-------------------------------------------------------